Dalalagen

(Äldre Västmannalagen)

(1)

SJgnaþe guđ meþ sinæ naþa warþi meþ ws allum saman. Oc sancto mario bön wars hærra moþir. oc alguzhælgun. oc þe hælghu kirkiu. ¶ Böndir förþu stuk oc sten. oc gundwal growu oc kirkio giorþu. Nu ær kirkia war gior. oc till wigslæ boyn. þa giorþu þeer tolf næmpdæ men til biscops. at beþas præst æfti þy sum ræt ær. Aghin böndir wald at wælia præst slikan þær þe wilia innan sæx manaþa. Siþan vti æru sæx manaþa. hawi þa biscopir wald at fa þem præst slikan þær han wil.

(2)

¶ Nu ær præstir takin. þa scal hanum hws fa. ena stuwu. ena laþu. eet biscops hærbærghi. eet stekara hws. eet hæst hws. eet fæ hws. eet wista hws.

(3)

Nu scal presti til föþu læggia þæt scal byria niþan warþa a akri. oc lycta owan warþa. at hwar sum niþir combir hwar tyundi tiughir. þær scal han een rök af hawa. Siþan skal taka þem twa luty þær æftir æru. oc skipta sundir J þry. een lut kirkiune. annan biscopi. þriþia fatökum mannum. (§.1.) ¶ Bondi skal tiunda præsti sinum hwarn tiunda kalf ælla pæning fori han. hwart tiunda lamb ællæ pænning fori þæt. hwaria tiunda gaas ælla half pænning firi. hwan tiunda kiþling ælla half pænning fori. han skal tiunda kalf oc kiþling nyu nata gamblan. oc griis .XIIII. nata gamblan. lamb oc gaas vm mikialsmæsso dagh. (§.2.) Böndir skulu kirkiu gewa tolf þynnia sæđ. oc fiuwr las oc tyughu æng. (§.3.) Bondin scar ræta tiund giora. aff ærtum. af humblagarđ. af lini hwan sæxtanda fitiæ swa oc af hampu. hwan tiunda fisk aff hwarium fisklekum. (§.4.) hwar bonde scal giora tiv pænninga præsti sinum. fori iamlanga offir. oc hwart hion offre en pænning a pascha dagh sum guzlikama takir. oc hwar leghodrængir oc leukuna fiora pænninga at tiþa cöp. oc allir þe sum giærninga men æru. þe skulu giora een öre pænninga at tiþa cöp. oc bođsæta gior örthug. æn þön æru tu saman. (§.5.) ¶ Wighis man meþ kunu sinni. gæwi þrea alnar gwt læriipt. gangir kona J kirkiu æptir bonda ælla barn sith. giwi haluan öre pænninga. ællær fiorar markir liius. (§.6.) Oc scal husfru a. altare bæra leff oc leef sufl. ¶ Wm kirkiumæsso dagh. oc vm hælguna mæssu dagh oc vm iula dagh. oc vm kyndil mæsso dagh. oc vm pascha dagh.

(4)

Præstir kan buđ fa. man at scripta ella barna at kristna. ella liik wighia. aff þæmma þrim skal han först man at scripta. oc hanum reþscap fa. fori þy at guþfaþir oc gudmoþir maghu barn döpa J. þrangun. oc giwin namn slit þe wilia. þæn döþe ma længst biþa. Dör man scriptælös præstir buđ fangit oc ær vtan forfall. böti þrea makrir. ¶ Dör barn v cristit. præstir buđ fangit böti þrea markir. (§.1.) ¶ Wardir bonde sivkir faar buđ præste hawir æi præstir hæst þa skal han taka stol aa halsic oc gangi til bondans. ¶ Nu wil æi præstir ganga oc bon dör scriptalös hæti wiþir præstir þrim markum. warþir prestir a wæghi vte staddir aghi witu meþ twem mannum sialwir han þriþi. wari swa þræll .i. witnum sum frælsman. (§.2.) Liggir owicth lik vm naat hæti wiþir þrim markir. Liggir owict andra naat oc þria markir. Liggir þriþiu oc þria markir. aff þæsse sac. takir þriþiung biscopir oc þriþiung malsæghande. þriþiung sookn oc kirkia. þa föra böndir liik owict til kirkiu. oc sætin i. kirkiugarđ. sæghir presti til. Jorþa lik þætta. iorþar iac æi sæghir han för een iak hawir pænninga mina i. handum. ¶ Laath þa wp kirkiu dyrin. latir iac æi wp sæghair han. þa scal till biscops fara næmđ aff soknninni. þa scal han læta fara præst sin iorþa liik þæt.

(5)

Böndir sculu kluccara fa. han scal fyrstum J. kirkiu wara oc senstum w fara. han scal wactæ nökkla oc liwss. Böndir sculu strængir til klocku fa. kluckare skal ringia gen baþe quickum oc döþum. (§.1.) klockarenum skal föþo fa. hwar bonde leef oc leefsufl oc trö korns. (§.2.) Liggir liik owickt j. sokninni fa buþ præste. han can æi hema wara. Sighi þa til klockarenum wari þær mæþ bondin saclös. (§.3.) ¶ Firi bondans sial oc husfru. givi presti nyw allna lærift. firi bondans barn fiora alna lærez. æn þæt ær at ængo komit. (§.4.) Nu scal klockare font wacta. han scal æi længir öppin standa æn fontir wighis oc barn döpiz. standir han længir oppin. can folk handum .J. gripa giældi kluckare þrea markir. Gripir man innan þæssa mællum giælde þrea markir. (§.5.) ¶ Brindir kirkia aff wangömu. kluckare böte .XL. markir. (§.6.) ¶ Warþir klucka lös i. bandum. þa skal kluckare bondum till sæghia wm een synnodagh. annan oc þriþia. wilia æi böndir wmboa. faldir klucka oc bristir hawin soknna mæn skaþa þæn þeer fangit hawa. Faldir þæssum klucka aa kluckare oc dör wnde hænne. bötin attir þan man meþ markum þrættan. taki þæt wp þan sum sandir ærwingi ær at. Sæghir æi kluckare bondum til. at klucka war lös .i. bandum. faldir klucka niþir oc bristir böti attir klucku markum siw. ¶ Faldir klucka þön þær standir pund ælla pundi mera. böti attir meþ markum þrættan. faldir mæsta klucka niþir standir þry pund ella þrim pundum mera. böti attir mæþ fyrum markum oc tiughu þætta ær eensokn soknna manna. Sæghir kluckare æi bondum till at klucka ær lös i. bandum. oc dör wndi þere klucku liggi vgildir. Faldir klucku klappir niþir oc slar kluckara i. hæl liggi vgildir. Löpir till annar nokor vtan kluckara buđ oc ringir. bristir þa klucka. giældi han klucku attir sum ringde. faldir oc klucka niþir aa han liggi wgildir.

(6)

¶ Nu ær barn fööt bæstum hællum. hawir baþi horn oc harr. dragher anda till oc fran. þæt barn skal döpilsi fa ær swen barn taki twa men oc ena kunu. þön sculu kunna. pater noster. oc credo. ær mö barn taki twa kunu oc en man. (§.1.) Langt ær til kirkiu fara guzziuiu sculu barn wacta. ¶ Sæghia swa guzziuiu. wi ærum æi för mæþ þæssu barnni ywi scoghin. þy at æfni ær æi i. barnninu. þa scal þæt barn döpa J. watni. J nampn faþurs oc sons. oc þæs hælgha anda. Nw hawir barn döpilsi fangit. þa skal þæt barn standa baþi arf oc wrf. Dör þæt barn þa skal þæt barn quart læggia. taki een aff gizziuiu oc standi til præstins. taki kluckare stænkil oc wight watn bæri till barns oc stænke a þæt. þa skal þæt till kirkiu föræ oc præstir skal þæt iorþa. glöma guzziuia þy. taka barn oc föra till kirkiu owict. föra ywir bolstađ hætin wiþ markum þrim. Föra ywir annan oc þrea markir. föra ywir þriþia oc þrea markir. föra ywir lanđ alt giældi æcki þy mera. gangir boot i. þræskipti. takir en lut kunungir. annan biscopir. þriþia bolstazmen. Combir biscops lænsmaþir oc sighir swa liik ær owict. næi sighia þön. þær kluckare till witna wara oc gozziuia. fa æi þön þe witne bötin þrea markir. oc gangi bot j. þræskipti. (§.2.) Nw kærir biscops lænsmaþir till bondans. at han förþe liik owict till kirkiu. wæri sik meþ þræstins witnum oc twem grannum ælla nagrannum sinum hawir twa aff þæmma wari saclös. oc gangi ængin eþir mera æptir.

(7)

¶ Nw cuma hion till kirkiu beþas wigilsi oc hionalagh bindæ. þa scal præstir þrea synnodagha i. sanghus durum standa spyrias fyri. æn nokor forfal ær þær i. at þe matin æi laghlika saman wæra.

(8)

Biscopir sacl wm lanđ riþa oc kirkiu wighia. byriar at minstu kirkiu. han scal hawa at wiksla fæ. þær tolf öra eenni borđ stallare oc stekare sæx öræ. biscopir scal þrætighi hæsta hawa. æki flerum corn giwa een tyw. Riþir till mere kirkiu. þær scal han hawa þrea markir at wikslæ fæ. stallare oc sterkare sæx öræ. oc twænni borđ. æi oc flere hæsta hawa æn för. ¶ Riþir till mæstu kirkiu. þær skal han hawa sæx markir at wikslæ fæ oc þrænni borđ stallare oc stekare sæx öra oc æki flere hæsta æn fyr

(9)

Mangt hawir warith oc opta ær ilz dömi swn hæfda moþur sina. ælla fahdur doctir sina. böti fori niw markir hwart þera gangi J þræskipti. taki en lut kunungir. annan biscopir. þriþia allimæn. ¶ Hæfdær broþir systir sina. ælla systirdoctir sina. böte hwart þera sæx markir gangi bot sum fyr. hæfdær sin þræ mænning. bötin niw markir baþin. skiptis bot fyr. Hæfdær fiurmænningin sin. ælla guzziuia sina böte þrea markir hwart þera. skiptis bot sum fyr. ær æi sandir at. wæri sik meþ tolf manna eþe oc wari saclös. (§.1.) Witis manni vm twa kunu. han a baþa þöm wæria ella fælla. ¶ Witis manni vm twa skyldar kunur oc fylgias aal wm een swar. stande een lagh fori þem. witis enne kunu vm twa skyldar mæn. warin lagh þe samu. skilias at þöm wm swar sin. hawi wæriandi þa witu. (§.2.) ¶ Nw sighir bicops lænsman skyldari wara æn þön wiþir ganga. standi a eþe oc witnum þera twæggia manna sum manninum æru skyldasti innan þriþiw byrd. oc þera twæggia sum kununni æru skyldaste innan þriþiw byrđ. Kænnis manni guzziuia lagh. oc sighir æi guzziuia lagh wara. wæri sic meþ guzziuium sinum sum a barnni hioldu. ¶ Æru þön fran fallin. wæri sic meþ tolf manna eþ oc twæggia manna witnum. (§.3.) ¶ Warþir man takin J. horsængh meþ kunu. oc meþ fullum skiællum. oc takir agrepp af baþum þem wari san at sak sinni. oc böti þrea markir hwart þera Warþir takit aff aþru. oc æi af baþum. hawi wizorđ oc wæri sic meþ twem witnum oc tolf manna eþ. oc dömis af þöm þrea markir. sum þön tooc oskiællika. Bot fori horsæng gangi J þræskipti. taki en lut kunungir annan biscopir. þriþia allimen. (§.4.) ¶ Warþir man inni takin meþ annars manz kunu J. sæng hans. Warþir han i. hæl slaghin ella baþe þön. synis þær bloþir a blöiu. ella a sængæ stuk liggi wgildir. oc wil han æi dræpa. han lösi sic meþ fyritighi markum. oc gangi i. þræskipti bot þön. (§.5.) kænnir bonde hustru sinne. ella hustru bonda sinum hoor fori ölstuw. ella fori soknnamannum. fylghi witni biscops lænsmanne. aghi þa wald at kæra till þes mans ella kunu þær þæt nampn ær giuith. æ til þæs han hawir lagh ella pænninga. ¶ Faar han æi witni meþ sik. aghi þa æi wald at guælia han wm þæt. (§.6.) ¶ Gangir man meþ eþ fori hoor. ella frænzsama spiæl. takir siþan samu kunu oc löþir burt meþ. hawi forlöpit wizorþum sinum. eþrin gange attir. kænnis manni ælla kunu hoor ella frænzæmispiæl. gangir lagh fori. föþis barn siþan oc han ær faþir at sum lagh hawir gangit at þy tali at barn war aaflat. fyr æn eþir war gangin. þæn eþir gangi till fastu oc fæboth. Sighir oc swa tal til. at þæt barn war aflat siþan eþir war gangin. þæn eþir stande oc böte hoor. ella frænzæmis spiæl.

(10)

¶ Nw kan maþer hawa þyþalagh meþ nokoru fæ wari meþ hwat fæ þæt hælst ma. hæfdar þæt sum kunu. warþir bar oc atakin. quickan scal þan man J. iord græwa. oc þæt fæ næsta hanum. sum han syndaþe meþ. Jnni þær script sina. þæt skal malsæghande giora sum fæt atti. ær han æi sandir at. wæri sic meþ witnum oc tolf manna eþe. gitir eþin gangit. wari saclös. faldir han at eþe. böti tolf markir. gangi J. þræskipti. taki een lut kunungir annan biscopir þriþia alli mæn. oc niw markir fori banz mal. oc biscopir raþe script hans.

(11)

¶ Warþir kuna takin meþ truldom. meþ horn oc haar quict oc döt þæt ma wel truldom heta. þæt ær fyritighi marka sak. ær æi san oc atakin meþ. wæri sic meþ þrim witnum oc þrætolftum eþe. gitir æi gangit eþin. fallen ær þæssum kuna at fyritighi markum. gangi bot i. þræskipti. taki een lut kunungir annan biscopir. þriþia alle mæn oc niw markir fori banz mal oc biscopir raþe script hennar. hawir æi böta. wari stens mattit oc stranda.

(12)

witis kunu belgmorđ. far hon swa til orþa. þær ær sanđ iæk födde barn. þæt war dööt. oc æi quict. þær skal hon hawa witni meþ. hun skal hawa twa kunur þær till witna sialf hun þriþi. far hon andra leþ til orþa. sæghir at hun aldri atti barn. þa skal hun wæria sic meþ twem witnum oc tolf manna eþi. far þænna eþ gangit wari saclös. far æi hæte wiþir tolf markir. gangi J. þræskipti taki een lut kunungir annan biscopir þriþia alli men

(13)

Þa sum sool gangir vndi wid wm löghardagh. þa ær inni synnudags hælg. oc vti sum sool gangir vndi wid. hwar sum wæckir blođ. ælla bærgs böti þrea markir gangi J. þræskipti sum fyr ælla wæri sic meþ laghum. (§.1.) witiz manni at han fastaþi æi ella förmde æi. þa skuldi fasta ella förma. böti þrea markir. takir lönscript att præstinum för en han fa sak fori þæt oc witna swa prestir meþ hanum wari saclös. Takir bonden ber fram kötmatd fyri hion sin þær han skuldi bæra fram fastomat. þa ær bortu lönscript æn flere wita. saclös æru hion hans. böti han þrea markir. J þræskipti sum fyr. ella wæri sic meþ laghum. (§.2.) Nw can prestir glömzskir wara. byuþir æi hælghadagha ella fastu dagha. prestir sighir buþit hawa. böndir næi sighia. taki prestir þem tolf þa at kirkiu waru han ræthlica þæt böd. witna þer æi swa meþ hanum. böti þa prestir þrea markir.

(14)

Qwæll prestir bondan wm offir ella tiund. þa han förþi sina tiund. wæri sic twem mannum af soknninni. sialwir han þriþi.

(15)

Wm þe sakir þær biscope oc kirkiu höra till. þa bondin ær laghwnhin. þa skal manas til meþ profastins breff wm en synnudagh. oc wm annan. oc wm þriþia. þær skal næmpna by oc bonda. wil han ræth giora innan þrea synnudagha wari saclös. wil æi. þa combir han J. forbuþ. ær J. forbuþi naat oc iamlanga. þa skal han J. ban lyusa. Sitir siþan j. banni ywir naat oc iamlanga gangi siþan wndi swærd kunungs wardir man sandir at böte þrea markir. Er æi sandir at wæri si meþ tolf manna eþ oc wari saclös

(1)

Þæssum maal æra kunungs ezöre. þön han taka scal. oc höghsta herranna. J swearike. þæt ær þæt fyrsta. hwar sum hæmpnas a annan oc annar giorþe giærningina. þa scal þæt hundaris næmđ wita hwat hældir han hæmpnaþis a annan oc annar giorþi gærningina. ella annar skilnaþir com þera mællum. (§.1.) þæt ær annat hwar sum hæmpnas a griđ oc giora sæt.

(2)

¶ Riþir man hem at andrum oc gior hanum hem sokn. hwat sum þæt ær een ælla flere. oc williandis hanum skaþa giora. ella nokorum J. hans garþi. þæt fyrsta þe J gard coma. sarghæ. sla til bloz dræpa ælla basta oc binda. þa hawa þe kunungs ezöre brutit. oc ær þær hwar howzman fori sic. þeer læggias alli biltughe oc þera bo til skiptis. (§.1.) Nw can swa wara at þeer riþa J gard oc ængin skaþa giort gita. vtan bryta hws hans. dylin meþ eþe tolf manna. oc twæggia manna witne. ella bötin sæx markir. þy at þær ær hööt meþ litlu bööt. (§.2.) Nw can þæn falla sum fangh byuþir. þær ær þem heem sokn giorđ. warþir slaghin sarghaþir ella dræpin innan gard oc grinda stulpa liggi vgildir. warþir dræpin innan J. garzliþi. falla fötir inn oc howd wt wari vgildir. þy at howd skal æptir fotum resa. fallæ fötir wt oc howd inn. wari gildir. vtan till seen at han J gardi fangit hafþi þæt han döþ af löt. (§.3.) Nw can þæn som æi ær bondans hion. sökia bondans gard fore owinum sinum J þrangum. þa agha hans arua æn han dræpin wardir ella saar gior bo skipta oc bötir taka. þan biþir J frid sum iorþina atti. (§.4.) Giors heem sokn a landboa ella a hion hans. þa a han J. frid biþia. giors a annan oc æi a hion hans aghe þa þæn iordæghande. (§.5.) Nw hittas men satir J garþi. oc skilias osatir. æn þö at giærđ comi þera mællum. þa ær þæt æi heemsokn. vtan han gangir af þem garþi oc J annan far sic wapin ella fylghi gangir attir oc gior til hans fulla gierđ. þa ær þæt heemsokn. (§.6.) ¶ Nw riþir maþir at garþi fori sinum owinum. skytir til hans ella kastar. far han skaþa J garþinum standir. þæt ær heemsokn.

(3)

Takir man kunu meþ wald. synis asyn annathigia a henni elle a hanum. þön han giorþe hænni. ella hon hanum ella ær þæt swa nær by ella wægh at höra ma oop oc akallan. Warþir þæt laghlica skuþat. þa a þæt hundaris næmđ wita. hwat þær ær sand vm. Takir man kunu meþ wald oc wardir takin ella fangin a samu giærning oc witna han tolf men þær till. þa a han wndir swærđ dömas. (§.1.) Takir man kunu meþ wald. oc dræpir kunan han J. þy. oc witna swa tolf mæn liggi wgildir.

(4)

Sitir man a kirkiu wægh. ella aa þings wægh. firi andrum dræpir. sarghar ella blod wita slar. han hawir brutit kunungs ezöre. Combir æi drap ella sar. ella blodwiti þera mellum. þa ær höt meþ ængo böt. Skil þem a kirkiu wægh ella þings wægh æi af langri awnd. wtan aff braþum gerningum. þæt ær æi kunungs edzöre. (§.1.) ¶ Fara men fran kirkiu ella þingi. far till sin win ella pænings öll. ella annan stad oc æi ginstan heem. sæs fori þem forsæti oc faar skaþa. þær ær æi kirkiu friþir oc æi þings fridir brutin.

(5)

¶ Takir man oc leþir annan til stuks. hoggir aff hændir ella fötir. þæt ær kunungs ezöre. wtan þæt kumi J wapna skipti. (§.1.) Gior kuna ella owrmaghi þylika gerninga böti meþ lagha botum. æi ma kuna ella owrmaghi frid flya.

(6)

¶ Hwar sum brutir a moot þæssum malum. han hawir firi giort allu þy sum han aa owan iorþina. swa mangir sum þe æru oc lanz wist. oc biltughir læggias wm alt rikit oc aldri J friđ coma. fyr æn han biþir fori hanum sum bönin atti. aghu flere bön æn een. hawi þan witu J friđ wil biþia. skiptis swa bot þön sum attu. (§.1.) ¶ Nw ma ængin annars firi giora. skipti allæ luti. fyrstu burt af þöm sum saclösir æru oc taki hwar sin lwt sum han aa. J. bonu. siþan hans luttir sum biltughir ellæ brutlikin ær skipti. J. þry een lut takir malsæghande annan kunungir. þriþia alle men. (§.2.) þæghar han biþir firi hanum sum han hawir brutit till ella hans arwa. þa aa kunungir hanum friđ giwa. oc han löse sic J. firđ kunungs meþ fyritihgi markum. (§.3.) þa þæsse næmđ skal næmpnas. þa skulu þeer baþe wiþir wara. oc ia wiþir sæghiæ. ær til manz laghlica þingat oc till þings stæmpt oc wil æi coma. Raþi þær domarin næmd at næmpna oc næmđ at fælla. wm all ezöris brut. skal nænđ næmpnas af sama þridiunginum sim malit ær. J. giort. hwilikin þeer tolf fælla han ær fældir sum fyr ær saght wtan kunungir wili þær wm sanninđ skuþa.

(7)

¶ Koma mæn satir saman J kirkiugarþe oc combir þær drap ella hog þera melllum. wari þær friþir. boot fyritighi markir. taki halft kunungin oc halft biscopir. gærningin æptir lanz laghum. (§.1.) ¶ Kunnu mæn hittas satir oc skilias osatir. þær ær æi ezörit brutit. hwilikin andrum gior a como J. kirkiu inni meþ wrez hænde. han hawir brutit kunungs ezöre

(8)

Hwar sum þen man hysir ella hemar sum biltughir ær laghþir oc sorin ena naat. vari saclös. hysir andra. oc þriþiu. böti kunungi þrea markir. hysir haldir ella föþir længir böti .XL. markir ella wæri sic meþ þrætolftum eþe. Hwar sum biltughan man hysir ella hemar innan þan dagh hanum ær laghþir. til þæs han ryma skal wari saclös.

(9)

Gior man forsæti andrum J husa skyli. garþaskyli. grindaskyle. scoghaskiuli. warþir þæn dræpin sum til combir. liggi J. twæböte. warþir þæn dræpin sum firi sitir liggi J. en böte. sæghir annar at forsæti ær oc annar æi. wæri sic meþ þrætolftum eþe oc wari æki forsæti wtan drapp innan comi. (§.1.) þrea markir takir biscopir aff hwariu drapi. a hwat daghi þæt combir till. þær ökis lagha boot meþ þrim markum þöm takir biscopir.

(1)

UM manhælghir manna ær swa wm mælt. Dræpir faþur sun sin. ella sun faþur sin þæt æru tyughu markir at manhælg hans. þa þræskiptas. taki een lut kunungir. annan biscopir þriþia hundarit. fall hans fyritighi markir. taki een lut kunungir annan biscopir. þridia hwndarit. (§.1.) Dræpir broþir broþur manhælg hans fæmtan markir fall hans fyritighi markir. skiptis bot sum fyr. (§.2.) Dræpas þræmænningia eller fiurmæningia. þær ær manhælg þera þrea markir. fall þeræ .XL. markir gangi bot sum fyr. (§.3.) Dræpas brylungar manhælg þera sex markir. fall þera .XL. markir gangi bot sum fyr. (§.4.) Dræpir moþur dottir sina. ella dottir moþur sina. manhælg henna tyughu markir. fal hænna fyritighi markir. wari swa boot mællum systra sum brödra. wari quinna halwm sum manna. (§.5.) Dræpir sun moþur sina manhælg hænna tyughu markir. fall henna .LXXX. markir. skiptis bot sum fyr. Dræpir moþur sun sin manhælg hans tyughu markir. fall hans .XL. markir gangi bot sum fyR. (§.6.) Dræpir broþir systir sina manhælg henna fæmtan markir. fall henna .LXXX. markir gangi bot sum fyr. Dræpir systir broþir sin manhælg hans fæmtan markir. fall hans .XL. markir gangi bot sum fyr. (§.7.) Dræpir bonde hustru sina manhælg henna niw markir fall henna attighi markir gangi bot sum fyr. Dræpir hustru bonda sin manhælg hans niw markir. fall hans .LXXX. markir. skipti bot sum fyr. (§.8.) Dræpas maghar sina mællum. liggin J. þings giældum.

(2)

¶ Slar sun faþur sin. þæt ær tolf marka sac. taki een lut kunungir annan biscopir þridia alle mæn oc þrea markir acoma hans. taki ena kunungir andra malsæghande þriþiu hundarit. (§.1.) Slar faþur sun sin frangiptan. þæt ær sex marka sac. acoma hans þrea markir. gangi bot sum fyr. Slar moþir dottir sina frangipta. þæt ær sæx marka sac oc þrea markir acoma henna gangi bot sum fyr. (§.2.) Slar broþur broþir þæt ær sæx marka sac oc þrea markir acoma hans gangi bot sum fyr. (§.3.) Slar þræmænningir ella fiurmænningir. þæt ær þriggia marka sac oc þrea markir acoma hans J. þræskipti sum fyr.

(3)

¶ Warþir man dræpin vtan ezöris brut. liggi J. fyritighi markum. þa gangin J. þræskipti taki een lut kunungir annan malsæghandi þridia alli men. (§.1.) ¶ Warþir bondin dræpin J. siælfsins hwsi inni vtan ezösis brut liggi J .LXXX. markum gangi J. þræskipti. taki een lut kunungir. annan malsæghande. þriþia alli mæn. Warþir dræpin J. garþi wti hittis æi biti ælla bæni. liggi J. sporgeldum. (§.2.) Warþir man dræpin oc lik föört i mosa ælla kiær ella i watn wt castaþir. liggi han i. mordgiældum morđ hans .XL. markir. manhælg hans .XL. markir. þa ganga J þræskipti taki en lut kunungir annan malsæghande þriþia alli men. (§.3.) Liggir liik a wighwalli wm naat swa at draparin lysir æi böti mark wm naat. fyri dylsbot. mark wm andra. oc þær til at wti æru tolf. giældi mark fori hwaria naat. þær ær tolf markir at dylsbot. þa gangi J þræskipti. taki een lut kunung. annan malsæghandi. þriþia alli men. (§.4.) Warþir kuna dræpin liggi J .LXXX. markum gangi J þræskipti sum. Warþir kuna myrđ wari morđ henna J .XL. markum drap henna J .LXXX. markum gangi boot sum fyr. (§.5.) Warþir kroklokarl dræpin swa gamal at han ær æi för till þings liggi J. twæböte. gangi bot sum fyr. (§.6.) Warþir grættingir dræpin þæt ær waggu barn. ær þæt swenbarn. liggi J .XL. markum oc sun vfödir J .XL. markum. ær þæt möbarn liggi J .LXXX. markum sun vfödir J .XL. markum þæssi boot gangi J. þræskipti. taki een lut kunungir annan malsæghandi. þriþia alli men.

(4)

¶ Warþir giestir dræpin at bondans. bonde a bana finna ella giældum wppi halda. (§.1.) ¶ Warþir giæstir dræpin vtan garđ oc winskeđ innan ta oc tomta ra þa agha byamen bana finna ella giældum wppe halda. Warþir han dræpin a bolstaþi ella a skoghum. þa aghu bolstaz men bana finna ella giældum wppi halda. (§.2.) Dræpas giæstir at bondans ænskir ælla dænskir. warþir han fangin þæt wærkir wighiandi ær. læse saman þæn döþa oc þan quicka dömis þan döþe iorþa oc þan quicka till lagha þinga.

(5)

Warþir man dræpin aa bolstaþi manna. bolstaþa men sculu bana finna innan naat oc iamlanga. hitta þe han þa. sculu þe han husabymanne J. hændir fa oc warin saclösir. slæppir han hanum böti fyritighi markir. þæt ær kunungs een sak. Hitta æi innan naat oc iamlanga. bötin bolstaþa men tolf markir. þessa boot takir kunungir wp þæt hetir dulgha drap. (§.1.) ¶ Hittis man döþir a bolstaþi manna. synis ængun handwærk aa hanum. witi prestir þa han liik wighir oc þe men wiþir waro warin bolstaþa men saclösir.

(6)

Dræpa flere men een man bötin allir ena boot oc fastin allir. oc wari han hwusman sum han til næmpnir. æi ma flere wtan þrea till bana orđ næmpna. ær nokur J. fylghi ella fara nöti. meþ þem sum drapu. oc ær æi sama wiliande. wæri sic meþ twem witnum oc tolf manna eþe. Hwar sum till raþbana næmpnis. ær sandir at. böti tolf markir. ær æi sandir at wæri sic meþ laghum.

(7)

þæt ær forlækis wærk. takir man læggir niþir wiþir iorđ skær wr sum galti. glatar þær vbornum. ær man vgiptir. böti vbornan sun meþ .XL. markum. dottir vföda meþ . LXXX. markum. saaR hans meþ .XL. markum.

(8)

¶ Warþir man barþir ella hoggin far formæli sin. oc næmpni skaþa. man sin firi scripta faþur sinum. oc þem mannum þær boa næst aghi þær ærwinge wizorþ.

(9)

¶ Wm drap ær æi sandir at. oc atakin wæri sic meþ þrim witnum oc þrætolftum eþe. þær skal rætir malsæghande firi wara.

(10)

Hwar sum dræpir man. höfþi sialwir een swa windir. at. halwa boot broþir hans æn han ær til. skiptir wiþir han. höfþi meþ ætinni. þeer allir bötin halwa boot. þe bröþir sum saman æru. bötin alli saman hwat enn brytir. Wtan brutit ær J. wrbotar mali ella J. giolsæmi.

(11)

howđ saar oc hwlsaar þem skal wærkiænde warþa. þær til vti ær naat oc iamlange. Wtan þe hawin siælwir sæt takit. dör aff þem sarum. liti swa arwin at sum hin takit hawir. Sar all annur. warþi æki længir æn attir ær helt oc hwdh iwi wæxin. gangir wiþ J. sin ytirsta tima fyri sinum scripta faþur oc flerum mannum. þæt han dör aff andri soot oc æi aff þem sarum wari saclös fori drapinu.

(12)

Warþir man hoggin fullum sarum. aa almænnings torghi. þæt ær .XL. marka sak. Warþir blar ella bloþughir. böti æpti lanz laghum

(13)

Um benlösning J. sarum. lösir man ben J. höfþi. þær ær þriggia marka sak. lösir annar oc þrea markir. lösir þriþia oc þrea markir. lösir flere been. æki boot þy högri acoma hans och þrea markir. War þæt giort i friþi. þæt æt þrim markum dyrra. þæssum bot gaar i. þræskipti. taki een lut kunungir annan malsæghande. þridia allimen. lösir æi ben w. far æki mera een þrea markir J. þræskipti sum fyr.

(14)

Slar man. blan man æru asynir a þem manni. þæt ær þriggia marka sac J. þræskipti sum fyr. æn þæt i. friþinum giörs þæt ær þrim markum dyrra J. þræskipti sum fyr.

(15)

Sarghan man wm hælghan dagh. þær aa J. biscopir þrea markir. gangi J. þræskipti sum fyr.

(16)

Combir kunungs soknari oc giwir till mæli. för æn siæluasæt ær gior. standir æki siælwasæt. dela þeer wm ena siælwasæt ær giör ella æi. Gitir bondin eþ sin gangit meþ twem mannum. standi sialuasæt. gitir æi. stande æki gangi þæn eþ þa soknarin wil.

(17)

Witiz manni afhog. Hoggir aff fingir af manni þæt ær þre markir at sarum. þa ganga J. þræskipti. oc þrea markir at læstis bot. taki þæt wp þan sum skaþan löt. tolf öra at lækis bot. taki siælwir lækis bot oc læstis bot. sarabötir gangin J. þræskipti. Hoggir flere fingir af. böti þrea markir fori hwart þera. þomal fingir ær eet iom dyrt at botum sum all annur. Hoggir þæt af tiw markir at sarum gangi J. þræskipti sum fyr. þrea markir at lytis bot tolf öra at lækis bot. taki þæt mælsæghande. (§.1.) Hoggir hand af manni. þæt ær tyughu markir at sarum. þa ganga J. þræskipti. taki een lut kunungir annan malsæghande. þriþia alli mæn. tolf öra at lækis bot. þrea markir at læstis bot. Hoggir af hanđ swa at hon hængir wiþir. tiw markirat sarum. hængir þær halwa boot gangi J. þræskipti sum fyr. (§.2.) Hoggir foot af manni tyughu markir at sarum tolf öra at lækis bot. þrea markir at læstis bot. skipta boot sum fyr. hoggir af swa at hængir wiþir. hængir þær halua boot. (§.3.) Hoggir öra af manni. þrea markir at sarum. tolf öra at lækis bot. tolf öra at lytis bot. hyl þær hattir halua boot. (§.4.) Hoggir næsar af manni. þrea markir at sarum. tolf öra at lækis bot. þrea markir at lytis boot. (§.5.) Stingir wt ögha a manni. þæt ær niw marka sak tolf öra at lækis boot. þrea markir at læstis boot. skipti boot sum fyr.

(18)

Kuma men at öldum saman. hittas satir oc skilias osatir. Combir þræta ella bardaghi þera mellum. þæt ær þriggia marka sak. kuna ær þær æ halwu dyrri J. allum saramalum oc acomum.

(19)

Læggir man meþ kniwi oc morđ wapn. þær ær tolf marka sac. þæssum sac þræskiptis. taki en lut kunungir annan biscopir. þriþia hundarit. þrea markia acoma hans. taki ena mark kunungir. andra malsæghande. þriþiu alle men. wari swa arwa skut sum knifslagh.

(20)

warþir acoma J by gior oc J. asyn manna. taki æ lysninga witni aff þem mannum asaghu. Warþir gior a gatu ella a genlötum. taki þa fyrsta by han til combir. han skal lysa at rykandi sari oc rinnande bloþe första dagh han far acomo. ella annan þær æptir. oc næmpne þæn sum giorþi. hawi þa æ syn witni oc wæriande ænga. lysir þæn dagh æi. ella annan þær æptir. lysir gamblu sare. oc æi mæþan nytt ær. hawi þa wæriande witu oc ænga þæn þær lysti. Bærin lysninga witni af acomu a manni. oc æi af bloþe af klæþum hans. gripir til lysningæ witnæ oc orkar æi böte firi þrea markir .J. þræskipti. kærir wm bardagha oc gripir æi til lysning oc wær hin sik. warin baþir saklösir. (§.1.) Nw sighir þæn sum saar hawir fangit. kunungs lænsman talar til þæs þæt giorþi. han swarar ængu. Hawir lænsman witni af skiælikum mannum þæt þe saghu acomu hans. hawi þa lænsman wizorđ. at fa annatthiggia aff þem acomu giorþi lagh ella pænninga. falz þa þan at. gangi boot J. twæskipte. taki halft kunungir. oc halft hundarit. (§.2.) Hwar saar sin wil gilda. han skal hawa til lysninga witni sum saghat ær til þings meþ sik J. fyrsta þingi. wari gild tala hans hawir æi hana standi wærnær iorđ fori bondanum

(21)

Uarþir man a wita. þæt scal lysa firi grannum oc soknnamannum. oc frændir hans agha han J. hæftum hawa. Combir þan man .w. hæftum dræpir man ella by brænnir. liggi by J. waþa giælde siw markum. taki þæt þeer wp sum sin hawir latit. ær æi boot þy mere. þo at baþe brindir by oc bondi. saar þe sum han giot. æru J. sex örum. swa skulu hans ærwingia baþi taka oc giælda fori han. æru æi lysninga witni till sum saat ær. wari þa gærningar hans. J wilia wærkum. baþi þæt han giorþi. oc swa þæt hanum giors.

(22)

¶ Warþir man dræpin meþ waþa ella saar gior. wil þæt ærwingi swæria ella han sum skaþa hawir fangit meþ þem sum giærningina giorþi. wari waþa boot. fylli waþa eþ firi drapp meþ twem witnum oc tolf manna eþi. oc siw markir at botum. fori saar twer meþ hwarium. þær ær boot æki mere æn sex öra. see þan eþir fori grannum gangin fyr æn næstu lagha þing koma. wtan at swa see at æi ær edsörth. þa sculu þa til kirkiu coma meþ twem mannum sum wæria sculu. oc byþas þer til. þæt þeer wilia þen eþ ganga. þæt fyrsta ezört warþir. Jnnan þe siw nættir. aghi ængin wizorđ tala þær aa. fyr æn a lagha þingum. wari waþa boot. ella pantir firi lagha þing. oc eþir gangin. ær æi swa giort. liggia þa J wilia wærkum. wtan æru þön faal innan sum saghat æru.

(23)

¶ Kastar man ywir hws. ella skyutir. fa skaþa af man ella kuna. witi wækiændi þæn waþa meþ twem witnum oc tolf manna eþi. sæghi hwsabymanni till oc biscops manni. æn han asaaki. böti waþa boot. æn þo at döþum se dræpin. far þær fæ skaþa af. giældi skaþa halwan oc eþ ængin. Castar man fram firi sic ella skyutir þæn han meþ öghum seer. þo eens waþi at baþi wilia swæria.

(24)

hawir man bruun J. garþi han skal bylia oc wm hylia. fallir man J han oc far af bana. han bötiz meþ waþa botum markum siw. ær æi huld ælla wm boeth. oc dör þær man .J. liggi J fullum lagha botum.

(25)

Dræpir owrmaghi man. minna æn fæmtan ara. hwaria lund han dræpir han. wari waþa bot siw markir. Nw sæghir annar æi owrmagha wara. þæt sculu tolf men wita.

(26)

¶ all aafal liggin J siw markum. oc all owanfal J. wbötin. Hawir man forn hws i. graþi. wil æi wm rycta ella wm boa. faldir a man oc far af bana. gildir ær han meþ siw markum. taki þen wp sandir ærwingi ær. samu lagh æru wm wiþakast æn han faldir a man. oc far af bana. (§.1.) Wil man ræta sten ella stuk faldir a man. oc far af bana. gildir ær han meþ siw markum. giælde þen þær giængis bidir. ¶ Wpdragha skipa. oc wt skiuta skipa. warþir man firi lunnum ella lynnar börþi. dör af giælde meþ waþa giældum markum siw. (§.2.) ¶ Hogga twe træ saman J. scoghi. warþi hwarghin andrum. Combir man gangande till oc faldir træ a han. liggi J. waþa botum. (§.3.) ær man J. skaal. wil dyur skyuta oc war fori man. liggi i waþa botum. æn baþe wilia waþa af giora.

(27)

hawi lænsman ængun wizorđ wm sara mall. wtan sandir malsæghande ær fori. ær oc malsæghande fyri oc ængin acoma wæri meþ laghum

(1)

Byggi karl J. by atti bolstad iorþa. a ræþ karll at sælia. oc saldi fiorþung i. by meþ fastum oc fullum skiællum. æn skiærpi sko at foti. sath wiþir karl oc nötti. æn ræþ karl at sællia. oc saldi fiorþung i. by meþ fastum oc fullum skiællum. þa toku þeer at dela sælu man oc köpuman. gafs þa salu manni lighri raþa. æn skiærpti sko at foti. sath wiþir karl oc nötti. ræþ a saldi fiorþung þriþia meþ fastum oc fullum skiællum. þa toku þer at dela saluman oc köpuman. gafs þa köpumanni wald oc wizord lighri raþa. æn skiærpti sko at foti. sath wiþir karl oc nötti. oc saldi han fiorþung þæn længst war attir meþ fastum oc fullum skiælum. þa grep karl til af næfninga. næmpdi aff burtompt i. by wtan brut oc tomtamal. nu sæl oc han þæt. æn næmpdi karl aff fiska dræt till scoghs. kroka fiski a watn. ko a reek oc soar. þa sæl oc han þæt. þa war þæn karl alsæla. þa skyria byrþmen oc sighia. þu hawir illa giort. hawir salđ byrđ wara. þa skyutir karl til þings. þæt han hawir laghbuþit þa iorđ. witi þæt meþ twem witnum oc tolf manna eþ. hawi þæn cöpp sum cöpti. karl hawi pænninga sina. falz at witnum. dömis þa iorđ i. byrđ attir. oc hin af þrim markum sum salde. taki ena kunungir andra malsæghande þriþiu alli men.

(2)

¶ Byuþir byrþar man fult til byrđ sinni. innan nat oc iamlanga. gangi iorđ J. byrđ attir. byuþir han æi swa. hawi þæn þær cööpt hafþi.

(3)

köpir man iord ella skiptir. næmpni fastar sina annat tiggia at kirkiu ella a þingi. oc soknamen sex hwar þera. Dela siþan wm þeer þæt köpti witi þæt tolf fasta wm cöpp þera oc wari swa gildir fasta arwi sum fasti. Sæmbir at. hawi þan wizord fleri faar. wari þæt alt eet köp oc skipti.

(4)

Hawir man iorđ J. hæftum sinum. oc gripir til cöps oc fasta. oc orkar æi fastanar. misti iorþina oc a þrea markir. wm aar. wm annat oc þrea markir fori þriþia æn han hawir swa længe hawat iorþina. gangi boot J þræskipti taki en lut kunungir annan malsæghande þriþia hundarit. Gripir oc swa til orþa. þæssa iord atti faþur min klasalöst oc klanda wari þæt meþ forhæfþis eþe. Dela twe wm forhæfþi. hawi þæn wizorđ i. handum hawir.

(5)

Binda twer cöpp a en man. byrþaman oc wbyrþaman. þa dömis eghur byrþamanni. oc wbyrþamanni wærd attir. oc þan af þrim markum sum saldi. J. þræskipti. (§.1.) Binda twer skipti ella cöpp a een. baþi byrdaman. ælla baþi vbyrdamen. þa giæfs þæssum wizorđ sum fyrra cöpti oc skipti. þæn kræwi attir wærd sith sum sænnæ cöpti. oc aff þrim markum salumanni firi giærsalu sina gangi bot J. þræskipti sum fyrra. stande þæt a tolf manna witnum. hwar þera förra köpti ella skipti

(6)

Skipta men eghnum þæt skal a fastum standa huru þera skipt ær giort. kræwir wm aar fult geen fullu fasta sæghia. kræwir wm annat. oc far han þæt. warin saclösir baþir. Warþir æi war iuir tw aar. hawi æi længir wizorđ at quælia. Nw kærir han at han hawir æi fult. þa coma þera fastar oc swæria sum þera skipti ær. þa sighir han. Jak hawir minna æn i sorin mik. wæþia þa wndi sanna syn. sæghia synamen at han hawir alt fult fangit. gangi þa hwar til sins oc af þrim markum wm aar. oc þrea markir wm annat. oc þrea markir fori waþa kastit gangi boot J. þræskipti sum fyrra. (§.1.) Nw can man baþi giora cöpp oc skippti. ær skipt mera oc cöp minna. standi þæt giort ær. ær cöpit mera. och skiptit minna. gangi iorđ attir i. byrþina.

(7)

¶ Aaf owrmagha ma æi iorđ köpa vtan liggir hungir a halsi. ella fæ giæld. þa sculu fæþærnis frændir raþa fæþærni. oc möþænis frændir möþærni. (§.1.) Skiptir faþir owmaghans möþærni ella moþir owrmaghans fæþærni med fæþærnis frænda raþi. þa skiptin þe til bætra oc æi til wærra. ær æi swa skipt. þa hawi han wald till sins attir ganga. þa han ær cumin til sin moghanda aldir.

(8)

Hwar sum köpir lut fal af andrum i akrum ælla i. ængium. witi þæt meþ fastum sinum þæn sum cöpti. Dör þen witi faþur oc sun fæþærni klandes þæt. wæri þæt meþ forhæfþis eþi. Nw sighir hin sum quæl. þu hawir wt fört ra. mera æn atti. wæþi wndi tolf manna syn. (§.1.) Hawir man lut fal i. ængium þæt sum baþe ær stakat oc stenat. oc liggir i hwarte warþir ella graþir. æ mæþan bonden byrghir sinu. byrghi oc han lut falli sinu. Warþi æki længir garþum æn hawir burghit sinu. warþi ængia garþum wt till ylians mæssu.

(9)

Gripir man til oc fasta. oc hawir hæfþat iorþina. oc orkar æi fastum. giui wt iorþina oc böti þrea markir fori aaR. oc þrea fori annat. oc þrea fori þriþia. gangi J. þræskipti sum fyrra. æn han hawir swa længi iorþina hæfþat. (§.1.) hawi ængin wizorđ at binda cöp a annars manz wppa iord sum han hawir raþit fyrra. (§.2.) Hwar sum sæl æghu sina ella giældir twem. hæti wiþ markum þrim J þræskipti.

(10)

gior man wp giærþir innan wærn flera manna. þæt aa han hawa wm þry aar. oc af at taka at saclösy. oc siþan till skiptis bæra. hawir længir inni oc beþas grannani þæt oc fa æi. fyr æn aa þingi cræwi. bæri þa til skiptis oc böti þrea markir. taki ena mark kunungir. andra malsæghande. þriþiu alli men. (§.1.) Gior man wp giærþis vtan wærn. ær awisning til. fawi fori fult fæþærni oc alđ oþill. oc han ryþir geen ruþu oc brötir geen brytu. skipta þa bætra oc sæmbra.

(11)

¶ Skipta twe bröþir twem bolstaþum. nu ær annar bætri. oc annar wærri. þær skal gödning till læggia sum krankarin ær. þær till iamt ær. sæmbir þem wm. hawin till fasta oc full skiæl. wil siþan quællia. hawi ængun wizord till.

(12)

köpas vskyldir mæn saman skipta eghnum ær oklutrat. oc wklandat .J. þera daghum. kombir annar æptir þem. wil siþan quællia oc klanda hawi ængun wizorđ till.

(13)

Hwar sum skiptir æghu wndir sik heem fyr æn mal ær wti. giwi afrad karli. swa mykit af afraþi sum vnöt ær. skiptir æi heem wndir sik. hawi afradskarl eghu þær til maal ær wti. (§.1.) Hwar sum annan rænir bool oc bygning ellar giptir wndan iorđ þa han hawir hawat. hæti wiþ markum þrim. taki ena mark kunungir. andra malsæghande. þriþiu alli men. (§.2.) Hwar sum hawir bool oc bygning annars manz. göþi swa hans iord sum sina. hwar sum æi gior swa. hæti wiþ markum þrim. taki ena kunungir. andra malsæghande þriþiu alli men.

(14)

¶ Sætir man æghu at wæþium. sæti niþir meþ fastum. þæt kalla wæþia fasta. læggin wndi stæmpnudagh wm naat oc iamlanga. taki attir a stæmpnodaghi meþ samu fastum. lösir æi han attir aa stæmpnodaghi. oc æi börþær mæn. Wari þeer þa oþilfasta sum fyrra waru wæþfastar. þem þær fastani fylghia þem dömum wi ægnnir

(15)

Læggiæ mæn bolagh saman. standir wm naat oc iæmlanga. wil een ryua oc annar wil halda. hawi þan wizorđ sum halda wil. Combir J döþir þera mellum skiptin æpti fullu bolaghi. dela þeer wm. annar sæghir wara bolaght. oc annaR æi. hawi þæn wizord þær wita wil bolagth.

(16)

¶ Sætiæ twer J. tak pænninga sina. wari saclös taksmaþir. þær til malsæghande kræwir wt pænninga sina. þa kuma þe til þings oc dela. hawi pænninga sum dömis.

(17)

Læggir man fæ in. læggi in meþ witnum. oc taki wt attir meþ witnum. wæþsæt fæ. ella inlagth fæ. brindir ælla stiæls ella waldtaks. fylghias bæggia at. þæt ær vgilt. fylghias æi bæggia. dömis þa hanum sith attir. wil han mera in witna. hawi hin wizord at wæri sik. oc gangi tw witni oc tolf manna eþ.

(18)

Borghar man pænninga fori annan. giældi þæt han sum borghaþi ella næi fori. Borghar han manni till swar oc combir hanum til þings. þær ma han aff borghan sægghias. ¶ Kombir æi til þings. böti sak han sum borghaþi. oc hwat man borghar a þingum. þæt star a þings witnum

(19)

¶ Ær by laghskiptir. sliker hawir sum hawir. sliker fiorþungir sum fiorþungir. sliker attungir sum attungir. Hwar sum hawir fiorþung i. by. raþe enum sköt ra. hwar sum hawir twa fiorþunga i. by. raþe halwm by. hwar sum minna hawir liti at lagha læghi. aghi ængun wizord at bryta by wp. vtan han aghi fiorþung i. by. (§.1.) Nw liggi fyra skutra niþri. þa liggir by .i. lagha læghi. hawin byamen tæ swa marg sum þem sæmbir sialwm wm. þæn sum boor norþan wart .i. by. han raþe skötrane synnanwart J by. þæn sum synnan wart a .i. by. han raþe skötrane norþan wart .i. by. þæn sum boor wæstæn wart i. by. han raþe skötrane östan wart i. by. þan sum boor östan wart i. by han raþe skötrane wæstæn wart i by ¶ Læggin tæ wtan skötaR sex alna bređ oc swa almanna wægh allan oc hawi ængin wizorđ at kæra þær a. wtan þan by sum aka skal æptir anlaþi sinu. hwar sum æi hawir swa böti þrea markir i þræskipti sum fyrra. hwaR sum liggir wiþ land oc wiþir wægh. han skal hawa rena gödning þriggia fæta. (§.2.) Dela þer wm by. swa langt þær þu rymir noor. swa langt rymir iac syþir. swa langt þu rymir östir swa langt rymir iac wæstir aghi þan wizorđ þær ryma wil. Læggi by soldraghin oc þær sum by ær laghskiptir. warin böndir alle saclösir. þær till þæt nokor þera giwir andrum sak. (§.3.) þykir bondanum þrangt J by. rymi burt a sialf sins tæktir. fae sialwir sik farwægh. baþi til waz oc wiþar. oc hawi wald oc wizorđ sum quar sittir a gamblum farwæghi. baþe nærr oc fiærre. (§.4.) Hwar sum aghir hws a annars manz tompt. sæghi wp wm aar. wp wm annat. wp wm þriþia. wil æi þa han af ryma. hawi þæn hws sum tompt aa. (§.5.) Sætir hws a annars manz tompt oc farwægh aldra manna. sæti niþir meþ markum þrim. oc taki wp meþ markum þrim J. þræskipti. taki een lut kunungir. annan malsæghande þriþia allimen. wari samu lagh wm gard æn han sætir han aa tæ sum wiþir by liggir. (§.6.) Hwar sum gior lighris willu andrum. læggir burt af stađ æghur manz oc i. annan stad hæti wiþir markum þrim. skipti sum förra.

(20)

Hwar sum riuir ra ær sandir at böti þrea markir. riuir annat oc þrea markir riuir þriþia oc þrea markir. gangi boot sum fyr. æki boot þy mere at han flere riuir. (§.1.) Hwar sum læggir ta a annan böti þrea markir i. þræskipti sum fyrra. ær æi bar oc atakin. wæri sik meþ twem witnum oc tolf manna eþ.

(21)

Liggir wæghir of nala manni. fari til þings oc spyris firi. han skal hawa doma firi sic. læggia wægh af þem stađ han fyrra la. hwar sum æi gior swa. riwir gambla wæghi. oc gambla grindastaþir. hawir æi doma firi sik sakir ær han at þrim markum i. þræskipti. (§.1.) Hawi ee þæn wizord ryma wil wæghi oc broa. warþi hwar garþum oc grindum oc browm. wm bolstad sin ella almanna wæghum oc kirkiu wæghum oc þings wæghum skulu alli men warþa oc broa. æn andrum wæghum a þe æi warþa ella broa. Dela þeer wm. annar sæghir wara kirkiu wægh annar æi. standi a tolf syna mannum.

(22)

Awarkar man manni i. akrum ella slar a ængium. witi attir gildi sins oc boot ængum at. kræwir oc fa æi ræt. fari til þings oc söki wt siit oc a þrea markir þa þræskiptas sum fyrra. haldir wm aar oc wm annat oc wm þriþia. böti þrea markir fori hwart aaR taki een lut kunungir. anna malsæghande þriþia alli men. (§.1.) Fa min sla annars æng. ræpsi wp oc hwælmi sum han kan bæst oc wari saclös. Skær ginum deld. skær ginum andra hæmpte wp ax. röki saman a þriþiu. aki swa in kornni sinu saclöst. hwar sum æi gior sua. böti þrea markir i. þræskipti. holdi wiþir han grinđ þær til hon fryss. swa at hon gangir hwarti wp ella attir. (§.2.) Læggir wad ella for a manni. læggir a delđ. læggir a andra. læggir a þriþiu. sæghir swa siþan. iac for wildir wm andra. iak for wildir wm þriþiu. giælde þæt attir a akrum þæt a akrum war. witi þæt meþ akralaghum sinum. standi þær wti attir saat korn. hö æn a ængium war. witi oc þæt attir guldit mæþ ængialaghum sinum. far æi þera witni böti þrea markir. far ywir þrea deldir oc fællir tolf manna syn han wari fallin at þrim markum i. þræskipti sum fyrra. wæria þe han wari saclös.

(23)

Hoggir döþwiþ i. scoghi annars manz. takin meþ lasse hæti wiþ öre. takin meþ andru oc öre. ær takin meþ þrim meræ. böti æi mera æn öre. ær ængu atakin. wæri sic meþ laghum. wari slik samu lagh wm skaf scogh oc wm næwir æn han löpir oluuis a skoghum manna oc wm bast löpning.

(24)

¶ Hwar sum hawir homblagarđ a tompt annars manz. gæwi þem fult firi sum topmt aa swa sum mæn mæta þera mellum. ella föri oc siælwir af siit. Jær homblagarþir vtan tæ oc tompta ra. hawir han awisning sum farith oc fikt hawir nöti siælwir ærwoþi siith. hawir ænga awisning. skiptin allir bolstad men swa. hwar sum han a til. Liggir homblagarþir innan ta oc tompta ra. taki hwar wp sum han a i. by oc i. bolstaþi.

(25)

Hawi ængin wizorđ tæppa watn swa at hin hawir skaþa af sum bo firi. hawi oc ængin wald at tæppa watn. swa at skaþar ængium ella akrum.